Tók ég eftir því þá? | hallahallahalla

Tók ég eftir því þá eða tók ég eftir því eftirá?

2013 - Blýantsteikningar á pappír, stór blýantsteikning og textar á vegg og kjóll.

Um verkið: Tók ég eftir því þá eða tók ég eftir því eftirá? byggir á eigin reynslu listamannsins af því að missa tökin á raunveruleikanum og fara í geðrof. Titill verksins veltir fyrir sér tilvist þess augnabliks sem geðsjúklingur eða aðstandendur hans átta sig á því að veikindin eru til staðar.

„Geðræn vandamál eru eitthvað sem fólk geymir oftast heima hjá sér. Ef þau væru t.d. kjóll, þá væru þau náttkjóll sem fólk klæddist einungis innanundir öðrum fötum og helst ekki þegar að það koma gestir. Stundum vex sjúkdómurinn á þann veg að það er ekki lengur hægt að fela hann. Er betra að fela hann hvort eð er?“

- halla birgisdóttir

Verkinu fylgdi gjörningur þar sem myndskáldið, klædd kjólnum, skrifaði texta beint á vegginn við hlið teikninganna. Gjörningurinn endaði með þvi að hún tók af sér kjólinn og skildi hann eftir.

Þegar að næturvörðurinn gaf mér kamillute

Þegar að trúin flutti fjöll og allar hurðirnar opnuðust á sama tíma

Þegar að ég áttaði mig á því að fólk í sjálfsvígshugleiðingum má ekki fara út á svalir til þess að fá sér ferskt loft

Þegar að ég fékk skilaboð frá sjónvarpinu

Þegar að ég hætti að naga á mér neglurnar

Þegar að ég beit í lyfið sem leit út eins og Mentos, það var ekki Mentos og tungan á mér bólgnaði öll upp

Þegar ég fór til heimilislæknisins með óútskýranlega verki

Þegar að ég skrifaði á saurblöðin í skáldsögunni sem ég var að lesa

Þegar að þetta var kjóllinn sem ég ætlaði að gifta mig í

Þegar að ég vakti hann í sífellu upp á nóttunni